Lovísa Lúthersdóttir, íbúi í Mosfellsbæ, á læðuna Múslí, sem hefur verið týnd síðan 9. mars. Eins og nærri má geta hefur þetta valdið Lovísu, eiginmanni hennar og börnum hugarangri. Í gærkvöld fékk fjölskyldan símtal sem í fyrstu leit út fyrir að vera góðar fréttir um að læðan væri fundin en svo reyndist ekki vera. Lovísa segir svo frá málinu í Facebook-hópnum Kattarsamfélagið:
„Kisan okkar er búin að vera týnd síðan 9 mars og enn höldum við í vonina að hún rati aftur heim. Í gærkvöldi fáum við símtal frá leyninúmeri sem við höldum fyrst að séu gleðifréttir því einhver á hinni línunni segir I have your cat! Maðurinn minn endurtekur Do you have my cat, Múslí?? Krakkarnir spennast allir upp og ég finn létti yfir því að þessi martröð sé loksins á enda! Þá segir hann Yes I killed your cat! Its dead! Og svo spyr hann hvort við eigum annan kött, eins og hann væri að gefa í skyn að hann vildi drepa hann líka. Hvað er að fólki?? Eru einhverjir fleiri búnir að fá svona símtöl? Mig langar allavega að trúa að þetta hafi verið símaat.“
Hringt var úr leyninúmeri. Lovísa segir í samtali við DV að fyrst hafi verið hringt í hennar símanúmer en hún ekki hirt um að svara þar sem matartími fjölskyldunnar stóð yfir. Á næstum því sömu sekúndu var hringt í eiginmann hennar.
„Hvort þetta er kattardráp eða ömurlegur hrekkur er ómögulegt fyrir mig að segja til um,“ segir Lovísa. Hún segist ekki víða hafa gefið upp símanúmer sitt í auglýsingum eftir kettinum. „Það er til kattargagnagrunnur og þar fylgir símanúmerið, ég hef auglýst sjálf en þá fylgir ekki símanúmer nema á einum stað, ég setti upp prentaða auglýsingu í iðnaðarhverfi hérna fyrir ofan, þar sem Ístak er að vinna, þar eru svo margir útlendingar og því ég hugsaði með mér að útlendingar væru ekki mikið inni á þessum kattasíðum á Facebook.“
Segir Lovísa að það hvarfli að henni að sá sem hringdi geti verið einn af starfsmönnunum þó að hún vilji alls ekki fullyrða neitt um það. Ljóst hafi verið á mæli mannsins í símanum að um útlending var að ræða sem hefur ekki ensku að móðurmáli.
Lesendur eru beðnir um að skoða vel myndirnar af læðunni Múslí og ef einhver sem hefur orðið hennar var les þessa frétt er sá hinn sami beðinn um að tilkynna um það. Hún er örmerkt og er hægt að fara með hana til dýralæknis sem getur þá haft upp á eigandanum út frá örmerktinu. En einnig má tilkynna um hana í hópnum Kattarsamfélagið sem er opinn.
