Samkvæmt myndum, sem úkraínski herinn hefur birt, þá eyðilögðu úkraínskar hersveitir að minnsta kosti tvær flotbrýr yfir ána Donets og tugi ökutækja frá rússneska hernum. Talið er að allt að 1.000 rússneskir hermenn hafi fallið við tilraunir til að komast yfir ána. Þetta gerðist nú í vikunni.

Donetsk rennur á milli Donetsk og Luhansk sem Rússar og aðskilnaðarsinnar eru með á sínu valdi.

CNN segir að Úkraínumönnum hafi tekist að stöðva tvær tilraunir Rússa til að komast yfir ána á 24 klukkustundum. Myndir frá vettvangi sýna tvær brýr sem eru að hluta sokknar og að auki stígur reykur upp frá vesturbakka árinnar. Einnig sjást mörg brunnin ökutæki og ökutæki sem eru í ánni.

Nokkrar af hörðustu orustum stríðsins hafa átt sér stað við Donets. CNN segir að það hafi reynst „martröð“ fyrir rússneska herinn að reyna að komast yfir úkraínskar ár.

Serhiy Hayday, yfirmaður úkraínska hersins í Luhansk, skrifaði á Twitter að tekist hafi að koma í veg fyrir að Rússar kæmust yfir ána. Hafi Rússarnir misst 70 ökutæki.

Anton Herasjtsjenko, innanríkisráðherra Úkraínu, skrifaði á Telegram að hann hafi rætt við úkraínska herforingja sem sagði: „Tilfinning mín er að rússnesku hershöfðingjarnir sendi einfaldlega hermenn sína til slátrunar.“

Forbes segir að hugsanlega hafi rúmlega 1.000 rússneskir hermenn fallið við Donets. The Times tekur í sama streng. Telur miðillinn að rúmlega 100 ökutæki rússneska hersins hafi verið eyðilögð, þar á meðal fjöldi skriðdreka.

Herasjtsjenko segir að um 250 ökutæki hafi verið eyðilögð og að 1.500 rússneskir hermenn hafi fallið.