Á samfélagsmiðlum hafa margir almennir borgarar birt myndir af þeim hörmungum sem þeir upplifa og lífi sínu í hringiðu stríðsins. Meðal þeirra Úkraínubúa sem hafa birt myndir á samfélagsmiðlum er Sasha Makoviy.
Hún birti nýlega færslu á Instagram og sagðist hafa verið að fara í gegnum myndirnar í síma sínum. Þá hafi mynd af fjögurra ára dóttur hennar, Vira, verið þar á meðal. Þessa mynd birtir hún síðan með færslunni en myndin var tekin í upphafi stríðsins.
„Það er erfitt að skoða myndirnar. Líf okkar var svo dásamlegt,“ skrifaði hún og bætti síðan við: „Á þessari mynd sést bakið á Vira á fyrsta degi stríðsins. Ég skrifaði skjálfhent á það. Af hverju, spyrð þú kannski? Þú veist kannski nú þegar hvernig það er að vakna við ærandi sprengingar sem heyrast í margra kílómetra fjarlægð. Ég skalf alltaf mikið á fyrstu klukkustund dagsins, eins og þú gerðir örugglega líka. Ég skrifaði á Vira ef svo færi að eitthvað kæmi fyrir okkur og hún myndi lifa af og einhver taka hana með sér.“
Á bak Vira skrifaði hún upplýsingar um fæðingardag hennar, nafn og fleira.
Mæðgurnar eru nú komnar á öruggan stað en það breytir því ekki að Sasha gengur enn um með lítinn miða í vasanum en á hann eru skrifaðar persónuupplýsingar eins og þær sem hún skrifaði á bak Vira.
