Matvælastofnun (MAST) hefur óskað eftir rannsókn lögreglu vegna atviks þar sem veist var að starfsmanni stofnunarinnar þegar hann var að sinna eftirliti. Þetta kemur fram í tilkynningu á vef MAST.

Þar segir að þetta sé í þriðja sinn á þremur árum þar sem máli sem þessu er vísað til lögreglu. Um brot gegn hegningarlögum sé að ræða en þar segi í 106. gr.

„Hver, sem ræðst með ofbeldi eða hótunum um ofbeldi á opinberan starfsmann, þegar hann er að gegna skyldustarfi sínu eða út af því, og eins hver sá, sem á sama hátt leitast við að hindra framkvæmd slíks starfa eða neyða starfsmanninn til þess að framkvæma einhverja athöfn í embætti sínu eða sýslan, skal sæta fangelsi allt að 6 árum.“

MAST segir að allt ofbeldi eða hótanir um ofbeldi í garð starfsmanna Matvælastofnunar verði kært til lögreglu.