Breskur hermaður, George Parker að nafni, hefur vakið talsverða athygli í heimalandi sínu fyrir þá ákvörðun sína að ákveða að halda til Úkraínu til að berjast gegn Rússum. Það er ekki síst hvernig Parker fjármagnar ferðina en til þess seldi hann glænýja Playstation 5 leikjatölvu í sinni eigu, með smá tapi.
Hann segist líta á það sem móralska skyldu sína að verja Úkraínu og að hann sé tilbúinn til þess að fórna lífi sínu fyrir málstaðinn.
Sá breski, sem er þrítugur að aldrei, er enginn nýgræðingur á vígvellinum því hann á að baki tvo túra til Afganistan þar sem hann var samtals sjö mánuði í fremstu víglínu. Í viðtali við Daily Star segist hann óhræddur við að takast á við rússneska herinn og segir þá ekki eiga neitt í pokahorninu sem hann hafi ekki séð áður.
„Ég er ekkert stressaður. Ég er stressaðri yfir því að ræða við fjölmiðla en að fara út á vígvöllinn,“ segir Parker sem skráði sig í herinn aðeins 16 ára að aldri og gekk til liðs við herdeild sem er kennd við Díönu prinsessu af Wales.
Parker heldur brátt til Póllands ásamt tveimur félögum sínum sem hafa enga reynslu af hernaði. Þaðan munu þeir ferðast til Úkraínu og freista þess að taka til vopna gegn Rússlandi eins og fjölmargir málaliðar frá hinum ýmsu ríkjum heimsins.