Leiðsögumaðurinn Christina, sem starfar hjá Nice Travel á Íslandi, birti sláandi myndband á Instagram fyrir stuttu sem sýnir ferðamenn hunsa rauða viðvörun frá nýja viðvörunarkerfinu í Reynisfjöru og leggja líf sitt í hættu. Meðal þeirra voru nýgift hjón í brúðkaupsklæðunum.
View this post on Instagram
Fimm banaslys hafa orðið í Reynisfjöru síðastliðin sjö ár og hefur það vakið háværa umræðu um að grípa þurfi til stórtækari aðgerða.
Þrátt fyrir skýrar merkingar hafa einnig komið upp lífshættulegar aðstæður. Í sumar varð banaslys í fjörunni og daginn eftir lenti þýsk fjölskylda í stórhættulegum aðstæðum þegar alda hrifsaði hana með sér. Sem betur fer endaði þetta ekki verr en með týndum myndavélum og hvekktum ferðamönnum.
Lilja Alfreðsdóttir, menningar- og viðskiptamálaráðherra, skipaði starfshóp um Reynisfjöru í janúar og átti hópurinn meðal annars að meta hvort loka ætti ferðamannastaðnum vegna hættunnar.
Eins og fyrr segir hafa merkingar verið virtar að vettugi undanfarin ár og var því ákveðið að grípa til harðari ráðstafanna. Í nóvember var greint frá því að uppsetning viðvörunarkerfis við fjöruna væri á lokastigi.
Nýtt merkingarkerfi, Vegrún, var hannað til að samræma merkingar, bæta upplifun ferðamanna og öryggi á ferðamannastöðum. Að sögn Skarphéðins Bergs Steinarssonar, ferðamálastjóra, er tilgangur Vegrúnar að benda skýrt á að í fjörunni leynist hætta.
„Hvort að þetta nái til allra eða hvort allir munu fara eftir þessu og taka þessi skilaboð til sín, það er annað mál. Við erum að gera eins vel eins og við getum að koma þessum skilaboðum á framfæri við ferðamenn sem fara þarna um þennan stað,“ sagði hann við RÚV í lok nóvember.
En eins og myndbandið hér að ofan sýnir fara ekki allir eftir kerfinu, en rithöfundurinn Þorgrímur Þráinsson var búinn að sjá það fyrir.
„Það verða alltaf til kjánar og jafnvel fávitar sem virða ekki viðvörunarmerkingar,“ skrifaði hann á Facebook í júní. „Sumir verða kjánar, eða fávitar alla ævi, og verða þá bara að taka afleiðingum gjörða sinna.“