Guðjón Valdimarsson, faðir Sigríðar Bjarkar Guðjónsdóttur ríkislögreglustjóra, gat ekki gert grein fyrir á fjórða tug vopna þegar lögreglan gerði húsleit hjá honum við rannsókn á hryðjuverkamálinu svokallaða. Guðjón hlaut aldrei réttarstöðu sakbornings þrátt fyrir að játa að hann hafði selt frá sér breytt ólögleg vopn í skiptum fyrir reiðufé. Þetta kom fram í kvöldfréttum RÚV.
Eins og greint hefur verið frá þurfti Sigríður Björk að segja frá rannsókn málsins vegna vanhæfis þegar að Guðjón faðir hennar, sem er þekktur byssusmiður og vopnasali hérlendis, blandist inn í málið. Á fjórða tug óskráðra skotvopna fannst á heimili hans eftir húsleit en Guðjón var ekki handtekinn og engar upplýsingar hafa verið veittar um stöðu hans í málinu.
Þá kemur einnig fram í umfjöllun RÚV að Sigríður Björk hafi áður þurft að segja sig frá rannsókn máls vegna föður síns. Árið 2018 hafi nafn Guðjóns komið upp í tengslum við rannsókn á meintui vopnalagabroti manns sem hafði rifil í vörslu sinni sem hafði verið breytt í hálfsjálfvirkan rifil.
Guðjón seldi manninum rifilinn en var aðeins yfirheyrður sem vitni en svo fór að hinn ákærði var sýknaður enda tókst ekki að sanna að hann hefði breytt riflinum. Þá var Guðjón yfirheyrður á heimili sínu vegna málsins en ekki á lögreglustöð eins og vant væri.