Héraðsdómur Reykjavíkur dæmt rúmlega sjötugan mann, Jón Arnar Pálmason, fyrir skattsvik í rekstri einkahlutafélagsins K.S.K. 177 ehf, sem sinnti starfsemi arkitekta og verkfræðinga; tæknilegum prófunum og greiningum. Félagið hafði verið tekið til gjaldþrotaskipta en meint skattamisferli Jóns Arnars varða rekstrarárin 2020 og 2021.
Sjá einnig: Jón Arnar virðist hafa gert skattsvik að lífsstíl
Jón var dæmdur fyrir að hafa ekki staðið skil á virðisaukaskattgreiðslum fyrir um 46,5 milljónir króna og ekki staðið skil á opinberum gjöldum fyrir 26,6 milljónir króna. Meint skattsvik nema því yfir 70 milljónum króna.
Jón Arnar var dæmdur í 24 mánaða fangelsi fyrir brot sín en þar af er 21 mánuður skilorðsbundinn til þriggja ára. Þá skal hann greiða 131.800.000 krónur í sekt til ríkissjóðs innan fjögurra vikna frá uppkvaðningu dómsins en ef hann er ekki borgunarmaður fyrir þeirri upphæð skal hann sitja í fangelsi í 360 daga í viðbót. Þá þarf Jón Arnar að greiða verjanda sínum 279 þúsund krónur í málsvarnarlaun.
Hér er hægt að lesa héraðsdóminn yfir Jóni Arnari
Þetta er ekki eina skattsvikamálið sem Jón er bendlaður við. Í frétt Vísis árið 2015 var hann sagður vera „margdæmdur skattsvikari“ en þá var hann dæmdur í 18 mánaða fangelsi fyrir vanskil á virðisaukaskatti í rekstri félagsins Protak. Nam vangoldinn virðisaukaskattur 15 milljónum króna.
Áður hafði hann hlotið skilorðsbundna dóma fyrir skattsvik árin 2011 og 2012.