Hún kom síðan fram í hlaðvarpsþættinum Eigin konur fyrr í vikunni og ræddi málið. Í kjölfarið fór málið að þróast hratt og í gær kom fram að fimmmenningarnir hafi látið af störfum eða séu farnir í leyfi.
Fréttablaðið hefur eftir Margréti Valdimarsdóttur, lektor í afbrotafræði, að sú þróun hafi orðið í málum af þessu tagi að nú stígi menn til hliðar og neiti ekki þeim ásökunum sem eru settar fram. Hún vísaði meðal annars í orð Hreggviðs Jónssonar í yfirlýsingu sem hann sendi frá sér en þar sagði hann meðal annars: „Það er afar þungbært að heyra um hennar reynslu.“
Margrét sagði þessa upplifun hans ekki koma á óvart: „Það er enn þannig að það eru ekki allir með á hreinu að það þarf skýrt samþykki að liggja fyrir öllum kynferðislegum verknaði, annars er það ofbeldi, þannig eru lögin.“
Hún sagðist hafa fylgst lengi með málum af þessu tagi og oft hafi það verið þannig að gerendur neiti sök eða saki þolendur um athyglissýki eða segi þær vera að hefna sín. „Það hefur verið tekið gott og gilt, sérstaklega ef þeir eru í valdamikilli stöðu en nú vita menn að þessi mál fara ekki neitt. Þolendum er trúað. Þessi mál fá athygli og viðhorf almennings hefur breyst,“ sagði Margrét. „Bara þetta, að þarna eru menn af þessu tagi, sem stíga strax til hliðar og eru ekki að neita fyrir að þetta hafi gerst, það er nýtt. Það er orðið skýrt að hitt gengur ekki, það hefði gengið fyrir tíu árum en það gengur ekki lengur,“ sagði hún einnig.
Í yfirlýsingu sem Logi Bergmann sendi frá sér í gær segist hann vera saklaus af þeim sökum sem hafa verið bornar á hann síðustu daga. Hann hafi hins vegar gerst sekur um að hafa farið yfir mörk í einkalífi fólks með því að hafa farið inn í herbergi sem hann átti ekki að fara inn í.
Nánar er hægt að lesa um yfirlýsingu Loga í frétt DV frá í gærkvöldi.
Logi lýsir yfir sakleysi – „Ég er hins vegar sekur um að hafa farið yfir mörk í einkalífi fólks“