Vogi, sjúkrahúsi SÁÁ, hefur verið lokað vegna Covid-smits. Þó liggja þar inni áfram 12 sjúklingar.
„Ég þarf að loka húsinu, það eru reyndar 12 sjúklingar eftir inni í nótt sem eru að glíma við alls konar og við gátum ekki fært úr húsi. En yfir 30 manns yfirgáfu spítalann í dag og fóru í sóttkví heima hjá sér,“ segir Einar Hermannsson, formaður SÁÁ.
Einar segir að tíu hafi greinst í hraðprófum. „Þegar slík staða kemur upp þarf maður að vera próaktívur og loka. Þetta voru sex skjólstæðingar og fjórir starfsmenn. Við vitum ekki nákvæmlega hvenær þetta kom upp, einn kom t.d. fyrir tveimur dögum og var þá neikvæður en greindist síðan jákvæður.“
„Þetta er stærsti vinnustaður SÁÁ og það eru margir komnir í svokallaða C-smigát, sem er þannig að fólk má mæta í vinnu en þarf að halda sig til hlés og þá er erfitt að sinna sjúklingum,“ segir Einar ennfremur. „Þeir sem eru eftir eru síðan bara einir í herbergi með salerni inni, þannig að þetta er orðið hálfgert sóttvarnahótel.“
Einar segir að ástand hinna smituðu sé misjafnt en þó ekki slæmt hjá neinum. „Það eru þessi dæmigerðu omicron-einkenni, hálsbólga og hiti, en það er enginn með slæm einkenni.“
„Við metum svo stöðuna í fyrramáli. En við gerum ráð fyrir því að spítalinn verði lokaður í einhverja daga og allt starfsfólkið er í rauninni útsett, þetta er mikið til vaktavinnufólk og vitum ekki hvenær þetta kom upp,“ segir Einar sem tekur hinni erfiðu stöðu af æðruleysi.
