Á sjötta tímanum í gær var ekið á hjólreiðamann í Garðabæ þegar hann var að fara yfir akbraut. Hann var á gangbraut og kastaðist 3-4 metra við höggið. Hann fann til verkja í læri, baki og öxlum. Eiginkona hans ætlaði að aka honum á Bráðadeild.

Um klukkan tvö í nótt var óskað eftir aðstoð lögreglunnar að hóteli í Miðborginni en þar var starfsfólkið í vandræðum með ofurölvi mann. Hann gistir venjulega í aðstöðu á vegum Reykjavíkurborgar en hefur verið í straffi þar síðustu daga og á því ekki í nein hús að venda og gistir á götunni í 7 stiga frosti eins og var nú í nótt. Hann fékk gistingu í fangageymslu lögreglunnar.

Á áttunda tímanum í gærkvöldi var tilkynnt um innbrot í fyrirtæki í Hlíðahverfi. Gluggi hafði verið spenntur upp og læsing brotin. Ekki liggur fyrir hverju var stolið.

Á áttunda tímanum í gærkvöldi var ökumaður kærður fyrir akstur gegn einstefnu í Hlíðahverfi.

Um klukkan 20 var ekið á ljósastaur í Háaleitis- og Bústaðahverfi. Enginn slasaðist en bifreiðin skemmdist mikið og staurinn skemmdist einnig.

Þrír ökumenn voru handteknir í nótt grunaðir um að vera undir áhrifum fíkniefna. Einn þeirra var einnig kærður fyrir of hraðan akstur 118 km/klst. á Vesturlandsvegi þar sem leyfður hámarkshraði er 80 km/klst.