Einn þeirra leikmanna sem hefur fengið skilaboð af þessu tagi er Jacob Holm. Í samtali við B.T. sagði hann að honum hafi borist „rúmlega lófafylli“ af slíkum skilaboðum. Hann sagði að sumir liðsfélagar hans hafi fengið fleiri skilaboð en hann og sagðist ekki skilja í þessu.
„Ég verð alltaf reiður yfir að fólki geti dottið svona í hug. Ég verð svo hissa á þessu þegar ég skoða prófíla þeirra sem senda svona. Þetta virðist vera venjulegt fólk sem skrifar svona. Það er furðulegt og ég er hissa á þessu,“ sagði hann og nefndi dæmi um innihald skilaboðanna sem honum hafa borist: „Þeir skrifa að ég sé „cunt“, að við höfum samið um úrslitin fyrir fram og að við séum „rasshausar“.“
Holm spilaði einna best af dönsku leikmönnunum gegn Frakklandi og honum finnst ekki mikið til þeirra koma sem saka Dani um að hafa tapað viljandi. „Það er algjörlega út í hött. Það tengist raunveruleikanum ekki neitt. Við ætluðum að gera allt sem við gátum til að vinna leikinn og við vildum gera allt sem við gátum til að slá Frakka úr keppni. Það gátum við bara ekki síðustu 10 mínúturnar. Við erum enn fúlir yfir því en við hlökkum til undanúrslitanna.“
Þegar hann las skilaboðin sem honum bárust á samfélagsmiðlum leyndi sér ekki að sendendurnir voru af íslensku bergi brotnir. „Ég hef fengið skilaboð eftir leiki í Búndeslígunni en þau eru oftast frá fólki sem hefur tapað peningum en þessi snerust meira um þjóðarstolt. Ég er ekki sérfræðingur í íslenskum eftirnöfnum en það var greinilegt að það voru Íslendingar sem sendu þessi skilaboð,“ sagði hann.