717 starfsmenn í leikskólum borgarinnar, grunnskólum, frístundaheimilum, félagsmiðstöðvum og skólahljómsveitum voru frá vinnu í gær, mánudaginn 17. janúar, vegna einangrunar eða sóttkvíar af völdum Covid-19. Þetta jafngildir 12,2% starfsmanna og er hlutfallið tveimur prósentustigum hærra en það var mánudaginn 10. janúar þegar það var 10,2% og 5% prósentustigum hærra en 3. janúar en þá var hlutfallið 7,3%. Þetta kemur fram á vef Reykjavíkurborgar.
Tæplega 1400 greindust með kórónuveiruna í gær og er hátt í helmingur þeirra börn undir sextán ára aldri.
Á vef Reykjavíkurborgar segir:
Leikskólar í Reykjavík
• Í leikskólum voru 406 starfsmenn í einangrun eða sóttkví sem jafngildir 17,1% af starfsmanna. Það er hækkun úr 14,3% sem var hlutfallið fyrir viku.
• Þá voru í gær tæplega 2.000 börn skráð fjarverandi ýmist vegna veikinda, sóttkvíar eða annarra forfalla í leikskólum borgarinnar sem er 31% leikskólabarna.
• Í um 31% allra leikskóla í borginni var a.m.k. einni deild lokað. Tveir leikskólar voru alveg lokaðir þennan dag.
Grunnskólar í Reykjavík
• Í grunnskólum voru 252 starfsmenn fjarverandi í beinum tengslum við Covid-19. Það gerir 8,6% starfsmanna og er hækkun úr 7,4% fyrir viku.
• Rúmlega 3.300 börn voru fjarverandi í grunnskólum borgarinnar ýmist vegna veikinda, sóttkvíar eða annarra forfalla eða 21% nemenda.
• Einn skóli var alveg lokaður vegna einangrunar og sóttkvía starfsfólks.
Frístundastarf í Reykjavík
• Í frístundaheimilum og sértækum félagsmiðstöðvum voru 30 starfsmenn í einangrun eða sóttkví eða 8,8% starfsmanna og er það aukning úr 7,5% fyrir viku.
• Rúmlega 450 börn voru fjarverandi ýmist vegna veikinda, sóttkvíar eða annarra forfalla í frístundaheimilum og sértækum félagsmiðstöðvum sem gerir 27% barna.
• Í félagsmiðstöðvum voru 27 starfsmenn í einangrun eða sóttkví sem jafngildir 16,1% starfsmanna og er það fækkun úr 9,5% fyrir viku.