Sumarið 2022 var það hlýjasta í Evrópu í 140 ár eða síðan mælingar hófust árið 1880. Þetta kemur fram í tilkynningu frá evrópsku loftslagsstofnuninni Copernicus.
Hitinn lagðist einna verst á Frakkland en þar var sumarið það næst hlýjasta frá upphafi. Bretar fóru heldur ekki varhluta af hitanum og þar féllu mörg hitamet í sumar. Meðal annars fór hitinn í fyrsta sinn yfir 40 gráður. Það sama gerðist í Hamborg í Þýsklandi en 40 gráður höfðu aldrei áður mælst svo norðarlega í álfunni.
Í norðaustanverðri álfunni var sumarið einnig heitt, til dæmis það fimmta hlýjasta frá 1900 í Finnlandi.
Í heildina var hitinn í álfunni 1,34 gráðum hærri í sumar en meðaltal áranna 1991-2020. Sumarið var 0,4 gráðum hlýrra en sumarið 2021 sem var þar með velt af stalli sem hlýjasta sumrinu í álfunni.
Ágúst hafði mikil áhrif á útkomuna en mánuðurinn var hlýjasti ágúst frá upphafi mælinga eða 0,8 gráðum hlýrri en gamla metið sem var frá 2018.
