Landsbankinn hefur tilkynnt um að dæmi séu um að greiðslukortafærslur hafi verið tvíbókaðar í dag. Unnið er að leiðréttingu og beðist velvirðingar á óþægindum vegna þessa.
Kona sem hafði samband við DV greindi frá því að há færsla hefði verið tvíbókuð hjá henni: „Sú færsla sem var tvítekin hjá mér var stærsta færsla mánaðarins, 158 þúsund kall. Fullt af öðrum færslum en stærsta færslan var tekin. Þetta þýðir það að ég er peningalaus í dag því þetta verður ekki leiðrétt fyrr en nótt,“ segir konan.
DV hefur fengið ábendingar um bæði háar og lágar tvíteknar kortafærslur og virðast tilviljanir ráða upphæðinni. Búast má við því að færslurnar verði bakfærðar í nótt. DV hafði samband við Rúnar Pálmason, upplýsingafulltrúa Landsbankans, sem segir:
„Vegna mistaka hjá þjónustuaðila lentu sumir viðskiptavinir Landsbankans í því að kortafærslur þeirra voru tvíbókaðar. Unnið er að leiðréttingu og er gert ráð fyrir að henni ljúki í kvöld eða í fyrramálið. Við biðjumst velvirðingar á óþægindum sem þetta veldur.“