Kolbrún Bergþórsdóttir, blaðamaður og samfélagsrýnir, botnar ekkert í Guðna Th. Jóhannessyni, forseta Íslands, fyrir að hafa látið undan réttatrúnaðinum og beðist afsökunar á því að hafa notað orðið fáviti. Þetta kemur fram í leiðara hennar í Fréttablaðinu í morgun.
Guðni Th. Jóhannesson, forseti Íslands, baðst í byrjun vikunnar skilyrðislausrar afsökunar á því að hafa í sjónvarpsviðtali nokkrum dögum áður notað orðið fáviti í umræðu um viðkvæm og erfið mál innan KSÍO. Hann birti yfirlýsingu þess efnis á Facebook-síðu sinni.
Eins og áður segir lét hann orðið falla í samhengi við KSÍ-hneykslið og ásakanir í garð landsliðsmanna. Forsetinn sagði að það væri mikill heiður að vera fulltrúi Íslands í fótbolta en þeim heiðri fylgdi ábyrgð og sú skylda að vera ekki fáviti.
Ekki er hægt að segja að gagnrýni í garð Guðna fyrir orðanotkunina hafi verið fyrirferðarmikil en engu að síður taldi forsetinn rétt að biðjast afsökunar. Eitthvað sem vakti furðu Kolbrúnar og segist hún ekki ein um þá skoðun.
„Margt gott má segja um forseta Íslands, Guðna Th. Jóhannesson. Hann er hins vegar of gefinn fyrir að stökkva á rétttrúnaðarvagninn. Dæmi um það er þegar hann baðst afsökunar á því að hafa notað orðið fáviti. Hann notaði orðið í merkingunni bjáni. Ekkert er að því. Enda botna fjölmargir alls ekkert í þessari afsökunarbeiðni hans.“