Hanna Björg Vilhjálmsdóttir, framhaldsskólakennari og formaður jafnréttisnefndar Kennarasambands Íslands, hefur vakið mikla athygli að undanförnu vegna beittrar gagnrýni sinnar á forystu KSÍ í tengslum við kynferðisbrotamál sem þögguð voru niður. Hún hefur nú ákveðið að bjóða sig fram til formennsku í Kennarasambandi Íslands.
Sjá einnig: Nærmynd:Hver er þessi Hanna Björg Vilhjálmsdóttir?
Hanna greinir frá þessu sjálf í færslu sem hún birti á Facebook-síðu sinni fyrr í dag. „Ef kennarar veita mér traust og þá er ég fús, viljug og áhugasöm um að leiða kennarastéttina næstu fjögur árin.
Ég hef starfað með forystu framhaldsskólakennara lengur en ég man – farið í gegnum samninga, ósætti, sigra og ósigra. Sú reynsla og þekking á Kennarasambandinu er dýrmæt og ég tel að hún muni nýtast mér í frekara starf innan sambandisins og í þágu kennara,“ segir Hanna í færslunni.
„Allir kennarar á öllum skólastigum eru mikilvægir og ég mun sannarlega gera mér far um að vera málsvari allra. Frá því ég hóf störf sem kennari hef ég haft áhuga og metnað fyrir bæði menntun í landinu og kjaramálum stéttarinnar. Það verður leiðarstef mitt ef kennarar treysta mér til forystu. Grundvöllur kraftmikillar kjarabaráttu er sterk sjálfsmynd stéttarinnar og rík fagvitund. Kennarastarfið er mikilvægasta starfið.“