Um klukkan 18.30 í gær datt kona af reiðhjóli á Seltjarnarnesi. Hún hlaut áverka í andliti og á hönd. Hún var flutt með sjúkrabifreið á bráðamóttöku. Um klukkan 21 var vespu ekið á ljósastaur í Bústaðahverfi. Einnig er talið að henni hafi verið ekið á kyrrstæða bifreið en ákoma var á henni eftir hjólið. Ökumaðurinn stakk af frá vettvangi.

Í Árbæ var maður í annarlegu ástandi handtekinn á níunda tímanum. Hann er grunaður um líkamsárás, eignaspjöll og þjófnað. Hann var vistaður í fangageymslu.

Tveir ökumenn voru handteknir í gærkvöldi og nótt grunaðir um að vera undir áhrifum fíkniefna. Annar þeirra var vistaður í fangageymslu en hann er einnig grunaður um fleiri brot. Hinn reyndist vera sviptur ökuréttindum og var þetta ekki í fyrsta sinn sem hann var staðinn að akstri sviptur ökuréttindum.