Lögreglan á höfuðborgarsvæðinu hefur til rannsóknar andlát konu á sextugsaldri sem lést á Landspítalanum fyrr í mánuðinum. Talið að er að andlát hennar hafi borið að með saknæmum hætti. Þetta kemur fram í tilkynningu frá Lögreglunni á höfuðborgarsvæðinu.
Önnur kona á sextugsaldri hefur verið úrskurðuð í gæsluvarðhald vegna málsins:
„Rannsókn málsins miðar vel en þann 25. ágúst var kona á sextugsaldri úrskurðuð í vikulangt gæsluvarðhald á grundvelli rannsóknarhagsmuna. Ekki er unnt að veita frekari upplýsingar um málið að svo stöddu,“ segir í tilkynningu lögreglu.
Uppfært:
Samkvæmt frétt á Vísir.is er konan sem er í gæsluvarðhaldi vegna málsins hjúkrunarfræðingur á geðdeild Landspítalans. Er hjúkrunarfræðingurinn, kona á sextugsaldri, grunuð um að hafa reynt að þvinga mat ofan í konuna með þeim afleiðingum að hún lést.
Uppfært:
Í tilkynningu á vefsíðu Landspítalans segir að Landspítalinn hafi tilkynnt um atvikið til lögreglu og landlæknis:
„Landspítali hefur tilkynnt lögreglu og landlækni um óvænt andlát sjúklings á spítalanum, í samræmi við lög um landlækni og lýðheilsu (nr. 41/2007) og lög um dánarvottorð, krufningar ofl. (nr. 61/1998). Málið er til rannsóknar og munu hvorki starfsmenn né stjórnendur tjá sig um það, né staðfesta upplýsingar, á meðan það er til meðferðar hjá þar til bærum yfirvöldum.“