Umræðan um bóluefni, gagnsemi þeirra, öryggi og tilgang ætti ekki að hafa farið fram hjá neinum undanfarin misseri. Hér á Íslandi hefur þó minna farið fyrir andstæðingum þeirra, enda um 90% þeirra sem á að bólusetja samkvæmt skilgreiningu heilbrigðisyfirvalda, þegar bólusettir. Annað er uppi á teningnum í Bandaríkjunum, en þar hefur þessi spurning svo gott sem klofið þjóðina.

CNN sagði frá því í vikunni, að hinar miklu deilur um bólusetningar hafi nú valdið því að fólk láti bólusetja sig á laun og hefur eftir Priscilla Frase, lækni í Missouri, að fólkið hafi jafnvel upplifað eitthvað fyrir sig sem fékk það yfir á aðra skoðun en fjölskyldumeðlimir þeirra. „Það skoðaði málið sjálft, talaði við fólk á eigin forsendum og komst að eigin niðurstöðu,“ sagði læknirinn við Anderson Cooper, blaðamann CNN.

Þá lýsir hún því að fólk hafi komið í bólusetningamiðstöðvar í dulargervi og gengið svo langt að grátbiðja starfsfólk þar um að þegja yfir ráðabrugginu. „Gerðu það, gerðu það, gerðu það, ekki segja neinum að ég hafi verið bólusett/ur.“ Þá segir hún heilbrigðisstarfsfólk gera sitt besta til að bregðast við óskum um leynd eða næði þegar kemur að bólusetningum. Hafa bólusetningar meðal annars verið framkvæmdar úti á bílastæðum sjúkrahúsa eða í gegnum bílalúgu.

Aðeins 41% íbúa Missouri eru fullbólusett en þar geisar nú mikil aukning í smittilfellum vegna Delta afbrigðisins svokallaða.