Umdeildi skopmyndateiknarinn Helgi Sig teiknaði mynd sem birtist í Morgunblaðinu í dag. Teiknarinn virðist ekki vera mjög hlynntur bólusetningum, en myndin virðist hreinlega mæla gegn þeim. Yfirskrift myndarinnar er: „Glæpur gegn mannkyni fyrir allra augum?“, en á henni má sjá risastóra bólusetningarsprautu stingast í gegn um manneskju sem spyr sig: „Verður maður ekki að treysta „sérfræðingunum“?“.
Ekki eru allir sáttir með myndina, en Þórður Snær Júlíusson, ritstjóri Kjarnans gagnrýnir myndina á Twitter. Þar bendir hann á að myndin sé í takt við samsæriskenningar er varða bólusetningar, en ekki endilega í samræmi við vísindin. Hann segir að myndin ýti undir falsfréttir og tekur fram að Morgunblaðið sé til í að birta myndina.
Mogginn birtir skopmynd þar sem tekið er undir inntak álhattamyndar þar sem því var ma haldið fram að bóluefni leiddi til ófrjósemi og að með því væri verið að planta örflögum í fólk. Já og að svindlað hafi verið á Trump í kosningunum. Falsfréttir á sterum. En Mogginn er geim. pic.twitter.com/mcjJKEh9Wv
— Þórður S. Júlíusson (@thordursnaer) July 27, 2021
Blaðamaðurinn Helgi Seljan minnist einnig á myndina í færslu sinni á Twitter, sem hann kallar: „glæp gegn skopskyni fyrir fárra augum“. Hann deilir þá frétt frá The Guardian er varðar umdeilt lyf sem vísindamenn vilja ekki rannsaka af siðferðislegum ástæðum.
Fyrir ykkur báða sem lásuð “skopmynd” Moggans í morgun.
“Glæpur gegn skopskyni fyrir fárra augum” https://t.co/d0HGG1Hj7D
— Helgi Seljan (@helgiseljan) July 27, 2021
Myndin hefur vakið talsverða athygli á samfélagsmiðlum og skapað miklar umræður. Þetta er ekki í fyrsta skipti sem mynd frá Helga Sig vekur athygli, en DV tók saman umdeildustu myndirnar hans fyrr í sumar.