Héraðssaksóknari hefur ákært karlmann frá Reykjavík fyrir kynferðislega áreitni í Hrunalaug aðfaranótt sunnudagsins 12. apríl í fyrra.

Segir í ákærunni að maður hafi strokið um bert bak og læri konunnar og reynt svo að toga hana til sín og um leið strokið og haldið um rass hennar utanklæða.

Í hegningarlögum er allt að tveggja ára fangelsi lagt við kynferðislegri áreitni, en þar segir að slík áreitni felist „m.a. í því að strjúka, þukla eða káfa á kynfærum eða brjóstum annars manns innan klæða sem utan, enn fremur í táknrænni hegðun eða orðbragði sem er mjög meiðandi, ítrekað eða til þess fallið að valda ótta.“

Héraðssaksóknari krefst í ákæru að maðurinn verði dæmdur til refsingar og greiðslu alls sakarkostnaðar. Þá gerir konan kröfu um að maðurinn greiði henni 1,5 milljónir í bætur vegna atviksins.

Styr hefur staðið um Hrunalaug undanfarin ár en sóðaskapur gestkomandi í lauginni hefur verið heimamönnum til ama. Sagði RUV til dæmis frá því í maí í fyrra að „partýstand og óþrifnaður“ hafi verið við laugina það vorið. „Þeir ætla að setja upp búnað svo að hægt verði að tæma laugina þegar þurfa þykir,“ var haft eftir Helenu Eiríksdóttur, landeiganda. „Aðkoman þarna á hverjum einasta degi hefur verið þannig að það var allt í dósum, glerbrotum, ælur, alls kyns ófögnuður sem að var ekki mjög skemmtilegt að þurfa að þrífa upp,“ sagði hún jafnframt í sama viðtali.