Tónlistarmaðurinn Auðunn Lúthersson, eða Auður eins og hann er betur þekktur, hefur verið mikið í umræðunni á Twitter undanfarið en hann hefur óbeint verið sakaður um ofbeldi gegn konum. DV greindi frá ásökununum fyrr í dag en nú greinir mbl.is frá  því að von sé á yfirlýsingu frá tónlistarmanninum vegna málsins.

Sjá meira: Þjóðleikhúsið með ásakanir á hendur Auði til skoðunar

Sem fyrr segir hefur mikið verið rætt um Auð á samfélagsmiðlinum Twitter undanfarna daga. Þar er hann sakaður um allt frá frelsissviptingu til kynlífs með stelpum undir lögaldri. Auðunn er sjálfur 28 ára gamall. Umræðan um Auð hefur verið í gangi á samfélagsmiðlum í þó nokkurn tíma. Fyrst var hann ekki nafngreindur nema undir rós en nýlega hefur það færst í aukana að nafn hans sé nefnt.

Markaðsefni fjarlægt

Vísir.is hefur nú greint frá því Un Women á Íslandi sé búið að fjarlægja allt markaðsefni með Auði í kjölfar ásakananna. „Jú, það er rétt. UN Women á Íslandi hefur fjarlægt allt markaðsefni með tónlistamanninum Auði. Það er vegna frétta á fjölmiðlum um ásakanir á hendur Auði sem hafa gengið á samfélagsmiðlum undanfarna daga, auk frétta um að Þjóðleikhúsið hafi til skoðunar þessar ásakanir,“ sagði Stella Samúelsdóttir, framkvæmdastýra UN Women á Íslandi, um málið í samtali við Vísi.

„UN Women trúir og styður við þolendur og fyrir vikið var tekin ákvörðun á vegum samtakanna um að taka út efni sem mögulega gæti triggerað þolendur.“