Lögreglumaður var fyrir Landsrétti í dag sakaður um vanrækslu og hirðuleysi í starfi með því að hafa látið hjá líða í starfi sínu sem lögreglumaður við leit í húsnæði að leggja hald á kannabisblandaðan vökva sem þar var og fyrir að hafa ekki framkvæmt frekari leit að fíkniefnum í húsnæðinu.
Áfrýjaði ákæruvaldið dómi héraðsdóms í málinu sem hafði sýknað lögreglumanninn.
Lögreglumaðurinn bar við í héraðsdómi að hann hefði ekki séð önnur kannabisefni við húsleitina en 300-500 millilítra af gruggugu og skítugu vatni í potti sem vitni hefði vísað lögreglumönnum á. Sagðist lögreglumaðurinn hafa leitað af sér allan grun um að önnur kannabisefni væru í húsnæðinu. Umrætt vitni hefði upplýst að hann væri að búa til kannabisolíu í pottinum þar sem skítuga vatnið var en lögreglumaðurinn sagði fyrir rétti að kannabisefni væru ónýt eftir suðu.
Lögreglumaðurinn sagði að hann hefði ekki talið réttlætanlegt að snúa öllu við í húsnæðinu. Hann hefði þó leitað eitthvað úti í garði enda þekkt að fíkniefni væru stundum grafin í jörðu. Hann kom þó ekki auga á 10 lítra fötu hálffulla af kannabislaufum sem þarna mun hafa verið.
Maðurinn er sakaður um að hafa brotið 141. grein almennra hegningarlaga: „Opinber starfsmaður, sem sekur gerist um stórfellda eða ítrekaða vanrækslu eða hirðuleysi í starfi sínu, skal sæta sektum eða [fangelsi allt að 1 ári].“
Það er túlkun Landsréttar á þessari lagagrein að til þurfi að koma ásetningur og telur dómurinn að ásetning hafi skort hjá lögreglumanninum í þessu tilviki.
Var hann því sýknaður af kröfum ákæruvaldsins og telst saklaus af ákæru um að hafa brotið af sér í starfi.