Á sjötta tímanum í gær var tilkynnt um mann sem lægi hreyfingarlaus á jörðinni í Bústaðahverfi. Hann reyndist vera ölvaður og sofandi. Hann var vakinn og hélt sína leið eftir að gengið hafði verið úr skugga um að ekkert amaði að honum.
Um klukkan 21 var tilkynnt um mann í annarlegu ástandi sem var að angra viðskiptavini á veitingastað í Hlíðahverfi. Maðurinn neitaði að gefa upp persónuupplýsingar þegar lögreglumenn ræddu við hann og var hann því handtekinn. Hann sá að sér þegar á lögreglustöðina var komið og gaf upp nafn og aðrar persónuupplýsingar og var frjáls ferða sinna að því loknu.
Tvær kvartanir bárust í nótt vegna samkvæmishávaða frá heimahúsum í Hafnarfirði og Kópavogi.
Í Hafnarfirði var tilkynnt um þjófnað á fellihýsi sem hafði staðið læst fyrir utan heimili eigandans. Í Hafnarfirði var tilkynnt um innbrot í heimahús í gærkvöldi.
Tveir ökumenn voru handteknir í nótt í miðborginni en þeir eru grunaðir um að hafa verið undir áhrifum áfengis og/eða fíkniefna.