Eigendur hins gjaldþrota ferðaþjónustufyrirtækis PT-ferðir, sem áður hét Prime Tours, hafa verið ákærðir fyrir skattsvik og peningaþætti. Skiptum í þrotabúi félagsins lauk í vor og voru lýstar kröfur 268 milljónir. Rúmlega 44 milljónir greiddust upp í forgangskröfur.
Félagið komst í fréttir árið 2018 en þá sá fyrirtækið um akstursþjónustu fatlaðra samkvæmt samningi við Strætó. Fyrirtækið fór þá í gjaldþrot en eigandinn freistaði þess að viðhalda aksturþjónustunni í gegnum annað félag. Keypti eigandinn bílaflota félagsins á nýrri kennitölu og undir heitinu Far-vel. Strætó samþykkti framsal á samningi Prime Tours til Far-vel um akstursþjónustu fatlaðra.
Þá sinnti félagið ýmiskonar ferðaþjónustu við erlenda ferðamenn og bauð til dæmis upp á afþreyingarferðir innanlands. Slitum er nú lokið á þrotabúi félagsins og heyrir það endanlega sögunni til.
Annar mannanna sem er ákærður var daglegur stjórnandi og stjórnarformaður félagsins en hinn var starfandi framkvæmdastjóri.
Ákæran varðar meint virðisaukaskattsvik upp á rúmlega 6,2 milljónir og vanskil á opinberum gjöldum, þ.m.t. staðgreiðslu á tekjuskatti starfsmanna, upp á tæplega 43 milljónir.
Þá eru mennirnir ákærðir fyrir peningaþvætti með því að hafa hagnýtt ávinning af þessum fjármunum sem ekki var staðið skil á.
Málið var þingfest í Héraðsdómi Reykjavíkur í dag, 14. júní.