Alla jafna er ekki mikið um átök í Facebook hópnum „Gamaldags matur,“ en undanfarið hefur róin og kyrrðin sem þar ræður ríkjum vikið fyrir miklum átökum. Efni rifrildanna: Kríuegg og hvernig þau skal elda. Meðlimir hópsins eru nú tæplega 26 þúsund, en ljóst að þeim gæti farið fækkandi ef þeir sem hafa hótað að hætta í hópnum standa við stóru orðin.

Í lýsingu hópsins segir:

„Þessi hópur er fyrir fólk sem elskar gamaldags heimilismat. Hér er hægt að deila myndum, uppskriftum og vísbendingum um gamaldags mat og hvar hann gæti fengist, rifja upp eitthvað gamalt og gott og ræða ástríðu sína fyrir gamaldags mat, áður en hann gleymist eða hættir að fást.“

Umræðurnar sköpuðust undir færslu konu sem spurði, að því er virðist í algjöru sakleysi, hvernig best væri að elda kríuegg sem hún hefði fengið gefins. Hún hefur örugglega ekki átt von á því sem koma skyldi.

„Skammarlegt að ræna undan kríunni,“ sagði einn, og þá var ballið byrjað.

Fólkið skiptist að því er virðist fljótt í tvær fylkingar, með kríueggjatínslu og á móti. Svo virðist sem þeir sem ekki eru hrifnir af kríueggjaáti haldi því fram að tínsla kríueggja hafi haft neikvæð áhrif á stöðu fuglsins í vistkerfinu hér á landi og að honum fari fækkandi. „Þetta er kannski gamaldagsmatur, en alveg örugglega ósiðlegt og ólöglegt,“ skrifar ein. Það er reyndar ekki alveg rétt, því eggjatínsla er leyfileg innan ákveðna tímamarka á hverju sumri.

„Af hverju er krían svona merkilegur fugl að ekki megi éta eggin hennar?“ spyr svo annar þátttakandi í umræðunum. „Það er nóg annað hægt að éta,“ er henni svarað. Annar líkir tínslu kríueggsins við fóstureyðingar, sem hann segir að sé „liðið“ í nútímasamfélagi. Segið svo að jarðsprengjusvæði sé ekki til á Íslandi. Annarri er svo bent á að samkvæmt lögum megi sækja egg utan varpsvæða og til 15. júní. Því er svarað til einfaldlega: „Lögin eru siðlaus.“

Hvernig sem umræðunum líður er ljóst að ekki eru allir á eitt sáttir við kríueggjatínsluna, sem þó er eins þjóðlegur matur og það gerist og ætti því, samkvæmt lýsingu hópsins hið minnsta, að eiga vel heima í þessum ágæta hópi.

„Ef maður er réttdræpur og heldur í forna siði til hvers er þá þessi síða, einhverjir skíthoppara drulla yfir mann sem halda að þeir séu eitthvað betri. Ulla og púfa yfir fólk sem veit hvað gamaldagsmatur er en hefur ekki hugmynd hvað það er,“ skrifar svo enn annar og er bersýnilega mikið niðri fyrir.

Friðunarsinnar eru dregnir sundur og saman í háði: „Meltingarfærin í friðarsinnum hljóta að vera friðuð og eru sjálfsagt alveg látin í friði líka, það er útilokað að þetta fólk láti nokkurn skapaðan hlut ofan í sig.“

Þegar spurningu um um hvað umræðurnar hefðu eiginlega snúist var svo loks varpað fram lá fólk ekki á svörum: „Í stuttu máli: Góða fólkið sturlaðist og hellti sér froðufellandi yfir konu sem að vogaði sér að borða kríuegg sem að henni voru gefin.“

Ljóst er að átökin eru að hafa mikil áhrif á þann góða anda sem ríkt hefur í hópnum hingað til. „Nú ætla ég að hætta í þessum hóp. Ég þoli illa sjálfskipaða stjóra sem úthúða fólki sem skrifar á hópinn sínar skoðanir og matarsmekk,“ skrifar ein og fær mikið lof fyrir. „Við erum ekki á flugvelli, það er óþarfi að tilkynna brottför,“ er henni svarað.

Tekið skal fram að átökin eru hvergi nærri hætt, en með þeim má fylgjast á grúppunni og auðvitað öllum frjálst að hella sér í umræðuna, eða svo til.

Á síðunni má jafnframt finna dásamlegar uppskriftir að allt öðru en kríueggjum, til dæmis þessa súrmjólkurréttsuppskrift: