Snemma á síðasta ári var kveikt í húsnæði skemmtistaðarins Pablo Discobar við Veltusund. Var þar að verki maður sem einnig komst í fréttir fyrir að taka steypubíl á byggingarsvæði við Vitastíg traustaki og aka burtu á ofsahraða við eftirför lögreglu.
Síðan þetta gerðist, í mars 2020, hefur ekki verið lyft glösum á þessum vinsæla stað en nú stendur það til bóta. Nýir aðilar, aðstandendur Secret Solstice hátíðarinnar, hafa nú tekið yfir reksturinn frá og með undirritun samnings kl. 14 í dag. Í tilkynningu frá nýju rekstraraðilunum segir:
„Það er frábært að segja frá því að við hjá Secret Solstice höfum náð samningum um yfirtöku skemmtistaðarins Pablo Discobar. Við höfum ekki fengið að skemmta Íslendingum síðan 2019 og getum ekki beðið eftir því að opna útibú í miðbæ Reykjavíkur þar sem við getum skemmt djammþyrstum alla daga vikunnar allt árum um kring.
Staðurinn verður rekinn með sama sniði og áður nema að við munum nýta okkar sambönd til þess að gera hluti sem ekki hafa áður sést í skemmtanahaldi í miðbæ Reykjavíkur. Það rými sem áður hýsti veitingastaðinn Burro mun verða hluti af barnum auk þess sem hægt verður að leigja salina fyrir hópa. Nú hefst vinnan við að koma staðum í stand og finna starfsfólk … stefnt er að opnun í júlí. Hlökkum til að sjá ykkur.“