Ríkissaksóknari mun ekki áfrýja niðurstöðu Héraðsdóms í máli ákæruvaldsins gegn Marek Moszczynski. Þetta kemur fram í svari embættis ríkissaksóknara við fyrirspurn DV.
Héraðssaksóknari flutti málið fyrir hönd ákæruvaldsins og krafðist Kolbrún Benediktsdóttir saksóknari embættisins ævilangs fangelsis yfir Marek fyrir þrjú manndráp, tíu manndrápstilraunir, brennu og brot gegn valdstjórninni. Svo fór að Marek var metinn ósakhæfur af geðlæknum og tók fjölskipaður dómur Héraðsdóms Reykjavíkur undir það mat. Marek var því sýknaður af öllum ákærum, sökum ósakhæfis.
Þannig liggur fyrir að Marek verður ekki gert að sæta refsingu vegna atburðanna við Bræðraborgarstíg 1 þann 25. júní að óbreyttu.
Marek var í sama dómi gert að sæta vistun ótímabundið á réttargeðdeild, þar sem hann dvelur nú.
Stefán Karl Kristjánsson lýsti því yfir við dómsuppkvaðningu að hann hygðist taka sér fjögurra vikna frest til þess að ákveða hvort dóminum yrði áfrýjað fyrir hönd Mareks, líkt og hann á rétt á. Aðeins vika er liðin af þeim fresti.
Málið ákæruvaldsins er eitt umfangsmesta sakamál Íslandssögunnar, en aldrei áður hefur maður verið ákærður fyrir svo mörg morð hér á landi.
Ekki náðist í Stefán Karl við vinnslu fréttarinnar.