Karlmaður hefur verið ákærður af Héraðssaksóknara fyrir einkar grófa nauðgun á heimili sínu haustið 2018. Er maðurinn í ákærunni sagður hafa haft önnur kynferðismök en samræði við konu með því að hafa í tvígang reynt að þröngva getnaðarlimi sínum inn í endaþarm konunnar og í eitt skipti í leggöng hennar.
Þá er maðurinn sagður hafa nuddað kynfæri konunnar og sett lim sinn í lófa hennar og fróað sér með því að hreyfa hendi hennar.
Við verknaði mannsins gat konan ekki spornað sökum ölvunar og svefndrunga, að því er segir í ákærunni, en hún hlaut rispur við leggangaop af árás mannsins.
Saksóknari krefst þess að maðurinn verði dæmdur til refsingar og að hann greiði allan sakarkostnaðar. Þá krefst hún tveggja milljóna í skaðabætur úr hendi mannsins. Á maðurinn yfir höfði sér allt að 16 ára fangelsi vegna brotsins, verði hann fundinn sekur um það.
Málið verður tekið til aðalmeðferðar 18. maí næstkomandi í Héraðsdómi Reykjavíkur og verður þinghaldið lokað.
Uppfært 4. maí kl 10:00: Í fyrri útgáfu fréttar stóð að maðurinn hafi verið ákærður vegna nauðgunar árið 2008. Hið rétta er að atvikið mun hafa átt sér stað árið 2018, samkvæmt ákæru Héraðssaksóknara.