Brotist var inn í Vínbúðina við Dalveg í Kópavogi og áfengi stolið þaðan eftir því sem segir í tilkynningu frá lögreglunni. Í miðborginni slasaðist ölvaður maður þegar hann ók rafskútu á ljósastaur. Hann var fluttur á sjúkrahús með sjúkrabifreið. Í Breiðholti slasaðist ökumaður bifhjóls þegar hann ók aftan á bifreið sem var nauðhemlað vegna gæsa sem gengu yfir akbrautina.

Á Austurvelli var kona í annarlegu ástandi til vandræða. Rætt var við hana og lofaði hún að hætta að angra gesti og gangandi.

Maður, sem var í annarlegu ástandi, var handtekinn í miðborginni en hann er grunaður um líkamsárás og vörslu fíkniefna. Hann var vistaður í fangaklefa.

Einn ökumaður var handtekinn í Garðabæ en sá er grunaður um að hafa verið undir áhrifum fíkniefna, að auki reyndist hann vera sviptur ökuréttindum.