Vegfarendur ráku eflaust margir upp stór augu þegar við þeim blasi varðskipið Þór í fullum skrúða rétt utan við Sæbraut í Reykjavík í dag. Mátti þar sjá að áhöfn varðskipsins hafði varpað út mengunarvarnabúnað og slöngubát af skipinu auk þess sem dráttarbátur tók þátt í aðgerðunum.
Í samtali við DV segir Ásgeir Erlendsson upplýsingafulltrúi Landhelgisgæslunnar að um árlega æfingu á notkun téðs mengunarvarnabúnaðs hafi verið að ræða. Segir hann slíkar æfingar fara þannig fram að 300 metra löng olíuvarnargirðing sé dregin út og olíudælu fleytt út. Þegar varðskipið bregst við olíuslysum dælir skipið olíu sem lekið hefur á haf út inn í tanka um borð í skipinu.
Dráttarbáturinn Leynir tók þátt í æfingu Landhelgisgæslunnar auk þess sem fulltrúar Samgöngustofu og Landhelgisgæslunnar fylgdust með.
Á myndunum neðst í fréttinni má einmitt sjá umrædda olíudælu, gula á lit og rauða olíuvarnargirðinguna.
Varðskipið Þór er nú eitt á vaktinni á Íslandsmiðum. Ákjósanlegast væri að hafa tvö, segir Ásgeir, en það verður einmitt raunin seinna í vikunni þegar lokið verður við bráðabirgðaviðgerðir á varðskipinu Tý. Týr mun svo standa vaktina með kollega sínum Þór fram á vetur þegar Freyja stimplar sig inn.
Myndir af æfingunni má sjá hér að neðan.