Laugardaginn 3. apríl síðastliðinn lést íslenskur karlmaður um þrítugt af völdum alvarlegra áverka sem hann hlaut eftir líkamsárás sem hann varð fyrir kvöldinu áður.
Karlmaður á þrítugsaldri var í dag í Héraðsdómi Reykjaness úrskurðaður í fjögurra vikna farbann, eða til 7. maí, að kröfu Lögreglunnar á höfuðborgarsvæðinu í þágu rannsóknar hennar á málinu.
Maðurinn hafði áður verið úrskurðaður í gæsluvarðhald á páskadag og rann það út í dag, en ekki var lögð fram krafa um áframhaldandi gæsluvarðhald.
Vísir.is hefur áður greint frá því að talið er að keyrt hafi verið á manninn. Upphaflega voru þrír handteknir en aðeins krafist gæsluvarðhalds yfir einum þeirra.
Lögreglan segir rannsókn málsins miða vel.
