73 ára gömul kona lést í kjölfar bólusetningar með bóluefni AstraZeneca í lok mars. Samkvæmt heimildum DV starfaði konan áður við kennslu og var við góða heilsu.
Í frétt mbl.is um málið segir að andlátstilkynningin sé sú sextánda, en sú fyrsta sem tengdist bóluefni AstraZeneca.
Í samtali við DV segir Rúna Hauksdóttir Hvannberg, forstjóri Lyfjastofnunar, að nú tæki við skoðun á mögulegu orsakasamhengi, sem væri fastmótað ferli. „Við skoðum mögulegt orsakasamhengi þarna og fáum til þess niðurstöður úr heilbrigðiskerfinu,“ segir Rúna. „Þegar um andlát er að ræða fer það í vissan farveg innan heilbrigðiskerfisins.“ Gögnin sem verða til við rannsókn á andlátinu berast svo til Lyfjastofnunar sem færir þær inn í alþjóðlegan gagnagrunn, svokallaðan lyfjagátargrunn, útskýrir Rúna.
„Við erum búin að tilkynna andlátið inn í grunninn, en svo fara bara meiri upplýsingar inn í grunninn eftir því sem þær berast okkur. Það er allt tilkynnt, þó það sé bara mögulegt.“
Samkvæmt tölfræði Lyfjastofnunar voru einstaklingarnir sextán sem létust í kjölfar bólusetningar á aldursbilinu 70 til yfir 90 ára. Á heimasíðu stofnunarinnar segir að 634 tilkynningar hafa borist stofnuninni vegna mögulegra aukaverkana í kjölfar bólusetningar gegn Covid-19. Af þeim eru flestar vegna AstraZeneca, eða 257 og fæstar vegna lyfs Moderna. Þó skal tekið fram að langflestir hafa hingað til verið bólusettir með bóluefni Pfizer/BioNTech, eins og sjá má á tölfræði af Covid.is hér að neðan.