Björgunarsveitir voru kallaðar út í kvöld til að leita af tveimur göngumönnum sem eru týndir við gosstöðvarnar. Þetta kemur fram í fréttatilkynningu frá Slysavarnafélaginu Landsbjörg.
Sveitir á suðvesturhorninu og úr Árnessýslu voru kallaðar út rétt fyrir 22:00 í kvöld. Um er að ræða tvo göngumenn sem eru týndir við gosstöðvarnar á Reykjanesi. Mennirnir náðu sjálfir að hringja í Neyðarlínuna og óska eftir aðstoð þar sem þeir eru villtir.
Þeir hópar björgunarsveitarfólks og lögreglu sem voru á svæðinu hófu strax leit um leið og meiri mannskapur var kallaður út. Í tilkynningunni kemur fram að samband náist við mennina og verið er að afla upplýsinga og skipuleggja frekari leit.
Uppfært:
Mennirnir fundust heilir á húfi.