Íslendingar eru sú þjóð sem líklegust er til að kvarta undan IKEA-húsgögnum á samfélagsmiðlum. Fréttablaðið greinir frá.

Samkvæmt greiningunni sem gerð var á streitu fólks vegna samsetningar á IKEA-húsgögnum innihalda 64% færslna frá Íslendingum orð sem benda til streitu. Einnig kom fram að íslenskir karlmenn eru líklegri til að skrifa færslur um IKEA-húsgögn en konur líklegri til að kvarta undan þeim.

Aðeins 8% færslna frá Suður-Kóreu sem fjalla um samsetningu IKEA-húsgagna innihalda streituorð og eru þeir neðstir á listanum.

Það eru sófarnir sem eru að valda Íslendingum mestri streitu en þar á eftir koma stórir stofuskápar, náttborð og vöggur. Þjóðin kvartar ekki mikið yfir samsetningu lítilla skápa, hægindastóla og skrifborða.

Íslendingar elska að fara í IKEA og hafa flest allir gerst sekir um það að ganga þar inn með það hugarfar að kaupa aðeins einn hlut en þegar haldið er heim á leið er bílinn yfirfullur af vörum sem IKEA hefur gabbað þig í að kaupa.

Þetta gerist alls ekki óvart heldur er IKEA-búðin sett þannig upp að þú þurfir að ganga í gegnum alla verslunina áður en þú getur yfirgefið hana. Jafnvel þó að þú ætlir einungis að nýta þér veitingastaðinn þá ertu samt neyddur til að ganga fram hjá nánast öllum vörum sem verslunin hefur upp á að bjóða.

Á Íslandi er aðeins ein IKEA-verslun og er hún staðsett að Kauptúni í Garðabæ. Verslunin er í eigu félagsins Hofs og var hagnaður félagsins vegna verslunarinnar 210 milljónir króna á síðasta ári.