Landsréttur hefur nú vísað dómi kæru sóttvarnarlæknis um úrskurð Héraðsdóms um skyldudvöl í sóttkvíarhótelinu frá dómi. Þar sem kærunni var vísað frá dómi stendur úrskurður héraðsdóms óhaggaður.
Svandís Svavarsdóttir heilbrigðisráðherra hefur nú tjáð sig um ákvörðun Landsréttar en hún gerir það í samtali við Fréttablaðið. Hún segir að núna sé hún og Þórólfur Guðnason sóttvarnalæknir að fara yfir það hvort möguleiki sé að skýra ákveðna þætti í reglugerð á grundvelli gildandi laga.
„Ég vonast til þess að við getum látið þetta taka gildi eins fljótt og hægt er. Við sóttvarnalæknir höfum talað um það að við reynum að ná markmiðum fyrri ráðstafana eins vel og við getum. Svo þarf að leggja mat á það hversu nálægt því við komumst. Ég útiloka það ekki að við gætum lagt til að það yrði að fara fram einhvers konar breyting á sóttvarnalögum en fyrst um sinn ætlum að við að fara þessa leið í gegnum reglugerð og framkvæmdina,“ segir heilbrigðisráðherra.
Svandís segir að hún og Þórólfur séu að hugsa hvaða skilyrði það eru sem þurfi að uppfylla til að sóttkví sé kláruð í heimahúsi. Þá séu þau ainnig að skoða hvernig það spilar saman við aðra þætti í sóttvörnunum. „Markmiðið er að reyna koma í veg fyrir eins og okkur er kostur að það komi smit inn í samfélagið. Það markmið hefur ekkert farið frá okkur þó að Landsréttur hafi vísað þessum álitamálum frá,“ segir hún.
„Þetta er það sem við ætlum að gera fyrst“
Svandís var spurð hvort verið væri að skoða möguleikan á hertu eftirliti með fólki sem tekur út sóttkví í heimahúsi eða þá frekar refsiheimildir fyrir sóttkvíarbrot. Svandís segir að verið sé að reyna að koma í veg fyrir brot á sóttkví með aðgerðunum í reglugerðinni.
„Það er náttúrulega markmiðið að við reynum að búa þannig um fótanna að það séu minni líkur á því að sóttkví sé rofinn. Því það er það sem er að valda smitunum inn í samfélagið og það er það sem var grunnurinn fyrir þessum ráðstöfunum sem voru til umfjöllunar í héraðsdómi.“
Þá segir hún að verið sé að skoða hvernig sé hætt að tryggja það í reglugerð að skilyrðin fyrir heimasóttkví séu strangari og skýrari. Ef ekki sé hægt að fara eftir þeim skilyrðum þurfi fólk þá að vera í sóttvarnarhúsi eins og sóttkvíarhótelinu á Þórunnartúni.
Svandís útilokar ekki að hún muni leggja fram frumvarp sem myndi gera reglugerðarákvæðið sem deilt var um löglegt en hún segir að fyrstu skrefin séu þau sem hún og Þórólfur eru að taka núna með nýju reglugerðina. „Þetta er það sem við ætlum að gera fyrst og sjá hvað við komumst áleiðis að þeim markmiðum að verja almenning fyrir frekari smitum,“ segir Svandís en hún vonast til þess að nýja reglugerðin taki gildi á næstu dögum.