Björgólfur Thor Björgólfsson var lengi vel eini Íslendingurinn sem metinn er á yfir milljarð Bandaríkjadala eða rúmlega 126 milljarða íslenskra króna. Samkvæmt nýjustu útgáfu Forbes-tímaritsins er Björgólfur númer 1.444 á listanum yfir ríkasta fólk heims.
Bjórgólfur fellur um 381 sæti á milli ára en samt sem áður hafa auðæfi hans aukist um 100 milljónir dala og eru eignir hans metnar á 2,2 milljarða Bandaríkjadala í ár. Á árunum fyrir hrun var Björgólfur metinn á 3,5 milljarða dala en hann tapaði flest öllum auðæfum sínum í hruninu.
Nýliði á listanum er Davíð Helgason, einn stofnenda hugbúnaðarfyrirtækisins Unity. Eigur hans er metnar á sléttan milljarð Bandaríkjadala og situr hann í sæti númer 2.674. Nýlega var fyrirtæki hans skráð á hlutabréfamarkað og við það jókst virði hluta Davíðs í fyrirtækinu.
Efstur á listanum þetta árið er Jeff Bezos, stofnandi Amazon, en hann er metinn á 188,5 milljarða dala. Á eftir honum koma þeir Elon Musk, Bernard Arnault, Bill Gates og Mark Zuckerberg en þeir eru allir metnir á yfir 100 milljarða dala.