Af fjórum smitum sem greindust innanlands í gær var enginn utan sóttkvíar. Þetta kemur fram í nýuppfærðum tölum á Covid.is.

123 eru nú í einangrun hér á landi með virkt Covid-19 smit, og 139 í sóttkví. Enginn er inniliggjandi á sjúkrahúsi.

Nýgengi innanlandssmita er nú 24,0 og hefur haldist nokkuð stöðugt á því reiki síðustu daga. Hæst fór nýgengi smita í tæplega 300 um miðjan október síðastliðinn.

24 þúsund Íslendingar hafa nú verið fullbólusettir og er gert ráð fyrir að 1951 árgangurinn verði boðið bólusetning í þessari viku. Að öllu óbreyttu verður hægt að bólusetja alla þá sem flokkaðir voru sem áhættuhópar í apríl mánuði. Þar á meðal eru allir 60 ára og eldri, og þeir með undirliggjandi sjúkdóma.

Upplýsingafundur almannavarna vegna Covid-19 faraldursins verður haldinn klukkan 11:00. DV flytur fréttir af fundinum.