Þeir ferðamenn sem hafa verið gripnir við upphaf göngu að gosstöðvum en áttu að vera í sóttkví hafa ekki verið sektaðir segir Ásmundur Rúnar Gylfason, aðstoðaryfirlögregluþjónn hjá Lögreglustjóranum á Suðurnesjum í samtali við blaðamann DV.
Fjórum aðilum var vísað frá upphaf gönguleiðar að gosstöðvum seinastliðinn fimmtudag en þeir áttu að vera í sóttkví eftir komu til landsins erlendis frá. Að sögn Ásmundar voru þeir mjög samvinnuþýðir og fengu þeir aðstoð frá lögreglu á svæðinu varðandi reglur í sóttkví.
Lögreglan hefur afskipti af fólki við upphaf göngu og hafa allir verið mjög kurteisir sem þeir hafa rætt við. Ásmundur segir það vera mikilvægt að ræða við fólk við svæðið vegna heimsfaraldursins sem enn ríður yfir.
Samkvæmt 19. gr. sóttvarnalaga nr. 19/1997, vegna COVID-19 þá á fólk sem brýtur sóttkví von á sekt á bilinu 50.000 krónur-250.000 krónur.