Jessie Lingard hefur viðurkennt að frammistaða hans hjá Manchester United hafi ekki verið upp á marga fiska vegna þess að hann hafði miklar áhyggjur af móður sinni sem berst við alvarlegt þunglyndi.
Miðjumaðurinn sem nú er á láni hjá West Ham hafði átt ansi erfiða tíma á Old Trafford og var frammistaða hans mikið gagnrýnd. Á þeim tíma átti Lingard við erfiðleika að stríða heima fyrir þar sem hann þurfti að líta eftir yngri systkinum sínum vegna veikinda móður sinnar. Þetta hafði mikil andleg áhrif á hann:
„Manni líður eins og maður sé ekki sama manneskjan, mér fannst ég ekki vera Jesse Lingard,“ sagði hann í fyrsta þætti Presenting á dögunum.
„Meira að segja í fótboltaleikjum þá fannst mér eins og leikurinn væri í gangi og ég gat ekkert gert og vildi ekki vera þarna – þetta var mjög furðulegt.“
Lingard lýsti því að móðir hans hefur barist við þunglyndi síðan hann var 12 ára og lá í rúminu alla daga með dregið fyrir. Þá hafi hann mest verið úti í fótbolta og ekki skilið hvað þetta þýddi.
Jesse var mikilvægur hluti af HM liði Englendinga árið 2018 og fannst erfitt að höndla pressuna sem var sett á hann á þessum tíma á meðan hann þurfti að takast á við veikindi móður sinnar. Þetta hafði mikil áhrif á andlega heilsu hans.
„Ég var bara glaður að fá að vera á bekknum og það er alls ekki ég. Hugurinn minn var á allt öðrum stað og mig vantaði einbeitingu. Ég hugsaði um aðra hluti og tókst ekki á við neitt. Ég reyndi að spila fótbolta, en var stressaður og leið illa og gat það ekki.“