Covid-19 smit hefur komið upp hjá nemanda í 9. bekk Álftamýrarskóla en skólinn er á öðrum degi í fimm daga skólaferð á Laugarvatni. Þetta herma öruggar heimildir DV. Foreldrar og forráðamenn barna í árganginum fengu póst í dag þar sem þeim var tilkynnt um þetta.
Börnin verða færð samstundis aftur til Reykjavíkur og fara í sýnatöku og í sóttkví. Foreldrar voru beðnir um að sækja börnin með grímu eftir sýnatöku og mega nemendurnir ekki umgangast aðra á heimilum sínum þangað til niðurstöður eru komnar úr sýnatöku.
Ekki náðist samband við Hönnu Guðbjörgu Birgisdóttur, skólastjóra Álftamýrarskóla, við gerð fréttarinnar.
Jón Aðalsteinn Bergsveinsson, upplýsingafulltrúi UMFÍ sem rekur ungmennabúðirnar á Laugarvatni, segir í samtali við DV að nemandinn sem reyndist smitaður af veirunni hafi ekki verið með í ferðinni. Aðilinn greindist smitaður í gærkvöldi og hafði hann verið í sóttkví frá því um helgina. Hann hafði mætt í skólann á föstudaginn og því var ákveðið að senda börnin heim af varúðarráðstöfunum.