Háhyrningar, þrír hið minnsta, hafa gert sig heimakomna í (á) Pollinum á Ísafirði. Afbragðs veður er nú fyrir vestan, þó hvasst sé, og röðuðu Ísfirðingar sér upp við sjávarsíðuna á bryggjunni sem og meðfram Skutulsfjarðarbraut, eða Hraðbrautinni, eins og hún er gjarnan kölluð.

Blaðamaður DV var á staðnum og fangaði meðfylgjandi myndir.

Þó mikið líf sé í Ísafjarðardjúpi, heyrir það til undantekninga að hvalir, hvað þá fjöldi háhyrninga, villist inn í botn Skutulsfjarðar og inn í (á) Poll.

Þegar þetta er skrifað er sjór að falla út og er búist við að háhyrningarnir muni fylgja sjávarföllunum út Skutulsfjörðinn og inn í Djúp.