Óprúttinn aðili notfærði sér vefforrit til þess að hringja í að minnsta kosti einn aðila í Grindavík og ljúga því að rýming væri fyrirhuguð í bæjarfélaginu á næstu tveimur dögum vegna eldgossins í Geldingadölum. Þetta staðfestir Gunnar Schram, yfirlögregluþjónn hjá lögreglunni á Suðurnesjum, í samtali við DV.
Forritið gerði það að verkum að símanúmer lögreglunnar birtist á síma móttakans. Símaatið virðist því hafa verið þaulskipulagt.
Að sögn Gunnars er málið er litið alvarlegum augum og er rannsókn á málinu hafin. Aðilinn virðist hafa ætlað sér að setja af stað orðróm meðal Grindvíkinga um rýmingu sem ekki á sér stoð í raunveruleikanum.
Heimildir DV herma að lögreglan hafi verið farin að fá fyrirspurnir um málið frá fjölmiðlum áður en hún heyrði af símahrekknum sjálf.
Eldgosið í Geldingadölum hefur nú staðið yfir í 30 daga en í dag virðist einn gíganna hafa gefist upp á gosinu. Hann hafði myndast á annan í páskum og gosið allt til dagsins í dag.