Þórólfur Guðnason sóttvarnalæknir segir „leiðindahelgi“ nú að baki eftir að tvær hópsýkingar komu upp. Ein þeirra kom upp á íslenska barnum í miðbæ Reykjavíkur og önnur á leikskólanum Jörfa.
Aðeins er liðin um vika frá því að tilslakanir á samkomutakmörkunum voru kynntar. Var þá farið úr 10 manna hámarki í 20, auk þess sem íþróttir, sviðslistir og ýmislegt annað var heimilað með takmörkunum.
Samkvæmt heimildum DV búa mörg fyrirtæki sig undir að fara aftur í „sama gamla farið,“ eins og einn verslunarrekandi orðaði það við DV í morgun. Það er að segja að takmarkanirnar fari aftur í 10 manns.
13 greindust innanlands á laugardaginn, og má því búast við að heildarfjöldi smita innanlands þessa helgina verði vel á fjórða tug.
Covid tölur gærdagsins verða birtar á covid.is klukkan 11:00.