Töluverð aukning hefur verið í smitum undanfarna daga en 13 manns greindust með kórónuveiruna í gær. 10 af þeim smitum má rekja til leikskólans Jörfa en starfsmaður greindist þar með veiruna fyrir helgi. Öll börnin á leikskólanum og foreldrar þeirra eru nú í sóttkví auk starfsfólksins.
Víðir Reynisson, yfirlögregluþjónn hjá Almannavarnadeild Ríkislögreglustjóra, segir að smitið megi rekja til landamæranna. „Við vitum uppruna smitsins og erum komin með niðurstöður úr raðgreiningu og slíku og þetta tengist landamærasmiti,“ segir Víðir um smitin í samtali við Vísi. „Við erum að fá betri sýn á þessi tengsl. Við sjáum beina tengingu við sóttkvíarbrot á landamærunum.“