13 einstaklingar greindust með Covid-19 í gær. Fimm einstaklingana voru í sóttkví við greiningu en samkvæmt tilkynningu almannavarna um málið hafði sóttkvíin staðið stutt yfir þegar smitin greindust.
Að minnsta kosti 10 af smitunum sem greindust í gær tengjast leikskólanum Jörfa við Hæðagarð í Reykjavík. Allir starfsmenn og nemendur skólans eru nú í sóttkví en það eru tæplega 100 börn og 33 starfsmenn.
„Samkvæmt nýlegum leiðbeiningum um heimasóttkví þurfa allir sem dvelja á sama heimili að vera í sóttkví og því má búast við að mjög margir verði í sóttkví þessu tengt næstu daga,“ segir í tilkynningu almannavarna.
Öllum börnum, foreldrum og starfsmönnum leikskólans verður boðið að fara í skimun í dag og verður sérstakur valhnappur settur upp á síðunni heilsuvera.is í tengslum við það.
Þórólfur Guðnason sóttvarnalæknir og almannavarnir hvetja alla þá sem hafa umgengist starfsmenn eða börn á leikskólanum Jörfa síðustu viku að fara í skimun. Þessi tilmæli eiga jafnt við um börn sem og fullorðna. „Einnig hvetjum við íbúa sem búa í næsta nágrenni leikskólans að fara í skimum, ástæðan er mikil samskipti á milli fólks og krakkarnir eðlilega mikið að ferðinni,“ segir í tilkynningunni.
„Mikilvægt er að allir sem finna fyrir minnstu einkennum sem gætu bent til COVID-19 fari í skimun. Til upprifjunar geta einkenni COVID-19 verið mismunandi milli einstaklinga og sumir fá væg einkenni en þau geta verið: hiti, hósti, andþyngsli, kvef, hálsbólga, beinverkir, höfuðverkur; sjaldgæfari einkenni eru ógleði, þreyta, uppköst og skyndilegt tap á bragð- og lyktarskyni.“
Fólk sem hefur verið veikt er hvatt til þess að snúa ekki aftur til vinnu fyrr en það hefur fengið neikvæða niðurstöðu úr sýnatöku. Stjórnendur og atvinnurekendur eru beðnir að huga sérstaklega að þessu.