Svandís Svavarsdóttir var að ganga út af fundi ríkisstjórnarinnar um nýja reglugerð sóttvarna og ræddi þar við fréttamenn Vísis í beinni útsendingu á visi.is. Reglugerðin mun taka gildi á fimmtudag og gilda í þrjár vikur.

Helstu breytingar eru eftirfarandi:

• 10 manna samkomutakmörkun verður 20 manna
• Íþróttir fara aftur af stað fyrir alla, börn og fullorðna.
• Sund og líkamsrækt eru aftur á borðinu og heimilaður fjöldi er fimmtíu prósent af starfsleyfi viðkomandi staða
• Sviðslistir fara aftur af stað  með þeim takmörkunum að fimmtíu mega vera á sviði og hundrað í sal
• Krár mega hafa opið fyrir nýja gesti til 21:00 og þurfa að loka 22:00
• Fjarlægðarreglur í skólum fara úr tveimur metrum yfir í einn

Svandís segist vona að eftir þrjár vikur sé hægt að fara í frekar afléttingar og jafnvel hraðari en það fari eftir framgangi veirunnar á þeim tíma. Hins vegar séu bólusetningar nú orðnar breyta í þessum aðgerðum og gangi þær vel.

Hún segir samstöðu í ríkisstjórninni um þessa reglugerð sem og aðrar þær rúmlega sextíu sem hún hafi lagt fram síðan faraldurinn nam land á Íslandi.