Eins og alþjóð veit þá lést Filippus Bretaprins þann 9. apríl síðastliðinn. Filippus fylgdi Elísabetu drottningu um heim allan og var hann með henni þegar hún heimsótti Ísland árið 1990.

Bryndís Schram hitti þau hjónin ásamt eiginmanni sínum, Jóni Baldvin Hannibalssyni, sem var utanríkisráðherra Íslands á þeim tíma. Þau fylgdu þeim meðal annars til Nesjavallavirkjunar þar sem drottningin vildi skoða svæðið. Hún rifjar upp þessi kynni sín í pistil á vísir.is

„Við héldum „social distance“ í rútunni. Ekki út af Covid-19, heldur af tillitssemi við hirðsiði drottningar. Það má enginn ávarpa drottninguna að fyrra bragði. Og almúgafólki ber að halda sig í hæfilegri fjarlægð,“ segir Bryndís en Jóni var síðan boðið að setjast við hlið drottningarinnar.

Hún vildi fá að vita meira um jarðhitaævintýri Íslendinga og var verulega vel upplýst og forvitin um svæðið. Hún vildi vita hvað hún gæti lært af gestgjöfum sínum. Bryndís segir Filippus hins vegar ekki hafa verið jafn áhugasaman.

„Öðru máli gegndi um eiginmanninn. Þetta var síðla hausts og fimbulkuldi úti. Þegar komið var í áfangastað til að skoða virkjunina undir leiðsögn jarð- og verkfræðinga, áttu sér stað eftirfarandi orðaskipti drottningar og eiginmannsins. Hann sagði: „Ég fer ekki fet út í þennan fimbulkulda. Þú ræður, hvað þú gerir, en ég fer ekki fet“. Drottningin gaf honum augnaráð, sem lýsti ekki bara vonbrigðum heldur vorkunnsemi. Hún fór út og gegndi skyldum sínum. Og kom til baka geislandi af áhuga. Hann sýndi engan áhuga og hreytti út úr sér hálfgerðum ónotum,“ segir Bryndís.

Bryndís segist hafa rifjað þessa sögu upp eftir að íslensk kona birti mynd af sér með Filippusi, þar sem má sjá glitta í Jón Baldvin í bakgrunninum. Myndin er einstaklega falleg og þar má sjá Filippus klappa hundi með fjölda fólks í kringum sig.