„Um eða upp úr klukkan þrjú í nótt varð vaktin á Veðurstofunni þess vör að líklega hefði enn önnur sprunga opnast, nú á miðja vegu milli þeirra gosstöðva sem opnuðust á hádegi þann 5. apríl og á miðnætti aðfaranótt 7. apríl.“ Þetta segir í tilkynningu frá Veðurstofunni sem fréttastofu DV barst í morgunsárið.

Segir að við sjónrænt mat á vefmyndavélum virðist sem hrauntaumurinn sameinast því hraunflæði er rennur í Geldingadali úr norðri. Í tilkynningu veðurstofunnar frá því í gær var sérstaklega varað við því svæði sem nú hefur tekið að gjósa. Svo virðist sem nýja sprungað hafi opnast undir nýrunnu hrauni.

Á vef Veðurstofunnar segir: „Mesta skjálftavirknin síðustu tvær vikur er norðarlega í kvikuganginum og nær að Keili. Rétt sunnan við Keili, við Litla-Hrút, mælast grunnir skjálftar og er fylgst vel með þeirri virkni. Grunnir skjálftar geta verið vísbending um að kvika sé að leita til yfirborðs. Ekki er því hægt að útiloka að kvika nái til yfirborðs norðar yfir í kvikuganginum sem nær að Keili.“